Thursday, June 23, 2005

* Dadaismo: Ti Nalipatanen A Teoria Iti Panagdaniw?

Dadaismo Iti Daniw

Bagtit! Pallaw! Minamaag! Awan serbina! Nabangsit! Makasugkak! Nangisit! Ngem agkararag met dagiti demonio... ket agpigergerda! Siak ita ti denggenyo... Wen, ta URNOSEK TI PANUNOTMO tapno makitam ti arte a bumusor iti arte... No awan ket AWANEN ti napintas, ideklaram nga awan ti uray ania a banag. Naindaklan a KINAAWAN! Ita, mangrugi dagiti adda manipud iti awan...

-oOo-

The Theory Of The Literary Chaos... Against Me!

Awan kano ti umno a nagrugian ti dada. Dimteng kaniak a diak napuotan...
No ania (adda uppat a nakitak a karag!)
ti dada, isu kano ti dada. Maiparit nga
ipatarus. Ti asinoman a mangipatarus, agbiddut. Iti panagbiddutna, maibilang a dadaistiko. Nangrugi iti
panagpinta (paintings) ti dada. Sa nagramaram ti dada virus iti lubong ti daniw, ket naawagan iti surruealism. Inaramat nga immuna iti daniw da (natay ti maysa, ngilngilawen!)
Andre Breton, Louis Aragon ken
Trstan Tarza daytoy idi arinunos 1820’s.
Namimpingsan a “rebolusion” iti panagdaniw! Adu ti naimpluensiaanna. Isu a nabukel ti dada manifestos. Maysa kadagitoy: ti dada isu ti amin; ti amin,
agsusungani; ni kaanoman, awan ti naurnos; ti agkuna a naurnos isu ti awanan urnos; ti bumusor iti dada, isu ti pudno a dada! (maysaka a ngilaw!)

Napnuan iti paradoks (paradox) ti aniaman a manifesto ti dadaismo.
Isu ti teoria nga ari-ari iti nihilismo a porma ti arte. Arte dagiti awan serbina; kasla awan - awan sa nga agpayso. No kaguram, sika met ti maysa a dada gapu ta maysaka a “sungani.”
Maysaka ngarud a mairaman iti adu nga (maysaak kadagiti tallo, siak ti guapo!)
agsusungani. No irantam ti agbalin a dada, mapaayka.
Aniaman a lumtuad iti isip
a di pinampanunot isu ti Pudno.
Lumtuad lattan dagiti pudno iti isip;
saan a ti isip ti mangparnuay iti kinapudno.
No naisurat dagitoy segun iti ilulutuadda iti isip,
dayta ti dadaistiko a daniw. Ni kaanoman awan urnos (Tallokami: Trinidad!) ti isip.
ket adtoy ti pangarigan ti dada a daniw: (Siak ti maymaysa a tallo, ket immadukami!)

SINTOMASIA

full moon.
diay sapin ti bakla?

mindanao. ^

iti uneg lababo
ti narba a pasdek idi kalman.
Centro.
...idiay page 21.
naitugkelen koma, anti!
file charges, general!
sirang taho dito? siokoy.

( Sir! )
sige pindutem! ink.
verb.

ni Julio Binsa Jr.
Mt. Palali, Bay. N.V.


Pagammuan, adda malagip ti isip. Agisem ti tao. Pagammuan, kitaenna ti oras. Agbaliw ti panunotna. Kasta ti pudno a taray ti isip ti normal a tao.
Ti dadaismo ti namunganayan ti surrealismo iti daniw.
Ania ti nagdumaanda? Iti dadaismo, awan ipapaawatna
nga imahe (image) no di laeng nihilismo iti ekspresion nga
agparang iti papel a mangipaay iti nadumaduma a kaipapanan.
Ti surrealismo, adda ipapaawatna nga imahe. Saan a realistko
iti social a lubong dayta nga imahe isu a surreal, kunada.
Kaarriek dagiti tradisional a mannaniw-Iluko dagiti kastoy a
kita ti panagdaniw. Ket dimi ammo no kasano - no nasimbengkami pay
wenno saanen? #

Wednesday, June 22, 2005

* Ti Nanumo A Pamiliak, Kabagis...

Daytoy, kabagis, ti nanumo a pamiliak. Awan koma daytoy no diak naguttog idi saan nga aggulagol ni Emie - balasang pay la idi - apaman a naiggamak ti pus-ongna. Saan pay, kunak koma idi, ngem kas met laeng kenka, kabagis, lalakiak met! Kapilitan a naparti ti baka ni manongko ket simmangoak iti pulpito a yan ti pastor a nangigibus iti kinabarok. Addayta, makitam iti makannigid ti immuna a bungana - ni John Buniag, agtawenen iti walo. Dayta met ni dallingko a dina man la tiniplak ti imak idi agkarayam kadagiti pus-ongna. Isu a nakaduaak a dina oras - ni John Bagnos dayta akin-kannawan, agtawenen iti lima. Ket awanen ti sumaruno, kabagis, ta ligate itan ni dallingko. Apay ngay, kunam? Napigsa la unay ni san pedrok, kabagis. Ken narigat metten ti biag, ta saanak met a nabaknang a kas kenka. Ala, dayta laeng ti maibagak...

Saturday, June 11, 2005

* Saranut: Consumatum Est ken Dada A Daniw

Dandaniw, kabagis, ti linaon daytoy immuna nga inkuribotmi. Saranutmi dagitoy manipud kadagiti napalabas a naikur-itmi. Dadduma kadagitoy ket inadawmi manipud kadagidi inkuribotmi nga impan iti Bannawag, Valley Journal, ken Salinong, a naipablaak. Anusanyo, ta daan bassit a saranut dagitoy iti kaublagan ti plumami. Ngem napilida tapno saan met a natamnay la unay dagitoy, para kenka, kabagis...

CONSUMATUM EST!

agam-ampayag dagiti iriag ti burburtia a dayag
iti mistisismo ti ibit ken kanagkag ti ballaag
a binuniagan ti al-alia a naal-alia iti ladawan
ta isunat’ naindaklan a diosat’ amin nga awan

naibulos ti umel a katawa dagiti agkakarupa
a puseg ti naganak a pakasaritaan a di nanglista
ta naguyek ti lubong ket natnag ti langit
ket nainaw ti mantra kirkirait a panagkitakit

adda genesis ti olympus dagiti panagkidem
agaya-ayam dagiti diosa ti pannakairarem
tapno ilaminada manen elehia ti masakbayan
ket manonto manen a panagrusing ti maawan?

kannigid ti yan dagiti awan a naiyaw-awan
iti innipitan nga ay-ayam di panagkikinnaawatan
agpakannawan koma ngarud itan ti di simumurot
a sampitaw ti natawataw a nakem ti managpudot

balangkantis itan ti ladawan ti din mangmangan
iti pisos nga isem ti ngiwat-ilem ti pinnurngetan
a kinnammet iti lamisaan dagiti pinggan ti iliw
nga agur-uray armagedon nga awan mangpalpaliiw

dumaponto dagiti pirpiriw kadagiti sanga ti arkos
ti nailungon a miselania ti ubing pay a panagrikus
dagiti salawasaw a propeta iti maburaken a lubong
tapno sumangbayen maudi a panagtataripnong

yannan ti ulaw dagiti ullaw ti naulaw a taaw?
ken kinabaknang dagiti masirib iti panagtapaw?
wenno ti ellek ti talek a naitalek iti naitulbek
a siled ti nasinged ken nabaked a panagkedked?

adtoy ti templo a pagkurnuan dagiti masikoran
ta uray tedted ti nakem ket dinton mabirokan
apayen ta agpangaton dagiti ayus ti karayan?
dagiti ulep ken dayag ti langit agkabusordan?

agam-aammangaw dagiti verbo ti panagsasala
iti altar dagiti eden ti mansanas a dinton maala
dagiti eva iti disierto ti agnanayon a panagsainnek
nakem kad pay ti langit no aminton ket agrarek?


SENARIO TI PAKAUNA’T MAUDI
(epipania para kenka, kabsat...)


naimassayagen ti sungbat... wen, ta isuda
dagiti nangapput iti lapayagda idi manggegdat’
awis ti pannakataginayon ti biag:
timek, angin, apuy, danum...

wen, isuda a nanglibbi-nangbaybay-a
iti daydi damag nga awan mangipadpadamag
(ta manoda la idi?) gaput’ kinaesoteriko
ti pannakabalin-mannakabalin-kababalin
ti maymaysa a punganay dagiti agnanayon...

agririnningbaw dagiti saludsod:
angot-uttot dagiti dung-aw...
angot-takki dagiti babawi ...
angot-isbo dagiti kararag ...
angot-sellang dagiti meditasion...
ta naladawen amin dagitoy...

iti law-ang:
agtatapaw iti sab-ok ti angin
dagiti napili a bin-i ti anges
a maimula manen iti sumuno
a pannatubay ti kinaagnanayon
a taeng dagiti pimmanawen iti panagrupsa

maitukitda iti lubong ti saklot
ti sakbibi ti agnanayon
agnanayon
agnanayon
agna -
nayon....



DATAYO

(Adda met DADA ti DANIW a DAAN)

Zen.
Araykooo!

“What” is a sentence?

Patatas a gatangenda.

Agpirmaka wenno saan?

Oblong.

Ekstensiyon sana, ate.
Tuna.

“Kalay itan, mewan?”

Trade Fair.
Awan.

Ngamin, saan a puraw.
Search for meaning.
Ingridients.

Diploma; nakadisso.

Kasta unay ti partakna: dialogo.

Idiay.
Ramay.

(P.S. Daytoy ti umuna a dada a pinutar ken inkuribotmi)


Powered by Blogger